ADA 2023 - Maarifçiliyə yenidən baxış

Abbas Abbasov Müqayisəli və Beynəlxalq Təhsil proqramı üzrə Kolumbiya Universitetinin Müəllimlər Kollecinin doktorantıdır. Onun tədqiqat obyektini Postsovet ölkələrində ali təhsil, onun beynəlmiləlləşməsi və təhsilin filantropiyasına dair problemlərin araşdırılması təşkil edir.

Dr. Ceyran Ağayeva Miçiqan Universitetinin Fasiləsiz Ali Təhsil ixtisası (HALE) üzrə fəlsəfə doktoru, həmçinin araşdırma köməkçisidir. Onun hazırki tədqiqat işi “Azərbaycan ali təhsili kontekstində müəllimlərin innovativ tədris üsullarına cəlb edilməsi” problemlərini araşdırmaqdan ibarətdir. Onun digər tədqiqat maraqları tədrisdə müəllim motivasiyası, ali təhsildə təlim-tədris məsələləri və tələbə müvəffəqiyyətini təhlil etmək, beynəlxalq təhsil ilə bağlı yenilikləri araşdırmaqdan ibarətdir.

Samirə Hacıyeva Fəlsəfə Doktoru dərəcəsini Miçiqan Dövlət Universitetindən ibtidai və orta təhsilin idarə edilməsi sahəsində almışdır. Doktorluq dissertasiyasının əsas mövzusu keçmiş Sovet ölkəsi olan Gürcüstan və ABŞ-dakı orta məktəb rəhbərləri tərəfindən öz müəllim heyətində etimad, etibar və əməkdaşlıq hisslərinin formalaşdırılması arasındakı fərq ətrafında qurulmuşdur. Bu istiqamətdə Dr Samirə Hacıyeva tədqiqatının əsas məqsədi məktəbin idarəetməsi və tədris prosesini qabaqcıl dünya təcrübəsinə uyğunlaşdırmaq istəyən Gürcüstanda məktəblərində müəllimlər arasında etibar və əməkdaşlığın yaradılması üçün rəhbərlik tərəfindən atılan addımları müəyyənləşdirmək və Azərbaycan kontekstində bu addımların tətbiqini təhlil etmək olmuşdur. Hazırda Dr. Hacıyeva ADA universitetində baş müəllim vəzifəsində çalışır. Tədqiqatçı hesab edir ki, effektiv məktəb rəhbərlərinin yetişdirilməsi tədris və təhsil proseslərinə ciddi şəkildə təsir göstərəcəkdir və nəticə etibarilə Azərbaycanda məktəblərin inkişafına gətirəcəkdir. Bu səbəbdən O mikro-idarəetmədən uzaqlaşmağa və məktəblərin təkmilləşməsinə özünü həsr etmək üçün yenilikçi rolunda çıxış etməyə hazır olan məktəb rəhbərləri üçün nəzərdə tutulmuş uzun-müddətli məktəb lideri proqramı hazırlayaraq gənc məktəb rəhbərlərinə dəstək göstərmək istəyir.

Dr. Vəfa Yunusova hazırda ADA Universitetinin “Təhsil” fakültəsində baş müəllim vəzifəsində çalışır. Dr. Vəfa Yunusova Amerika Birləşmiş Ştatlarının Miçiqan Dövlət Universitetində “Təhsilin İdarəedilməsi” ixtisası üzrə Ph.D. təhsil almış və həmin universitetdə eyni ixtisas üzrə 2019-cu ildə fəlsəfə doktoru elmi dərəcəsinə yiyələnmişdir. Dr. Vəfa Yunusova Azərbaycan Dillər Universitetindən 1991 -ci ildə məzun olub və 2009 – 2012-ci illərdə doktorantura pilləsində təhsil alıb. Uzun illər Azərbaycan Dillər Universitetinin “Regionşünaslıq və Beynəlxalq Əlaqələr”, sonradan isə “Təhsildə İnnovasiyalar və Gələcək Təhsil” kafedrasında baş müəllim kimi fəaliyət göstrəmişdir. Dr. Vəfa Yunusova ABŞ-dakı böyük bir tədqiqat universitetinin dörd illik kolleclərində akademik tövsiyələrin/məsləhətin verildiyi mərkəzlərin quruluşunu və bu təcrübənin təşkilini araşdırıb. Onun tədqiqat maraqları həm də ali-təhsildə akademik tövsiyələrin/məsləhətin verilməsi, tələbə müvəffəqiyyəti, təlim-tədris məsələləri, müəllim hazırlığı, liderlik, təhsilin idərəedilməsi və beynəlxaql təhsildən ibarətdir. Dr. Vəfa Yunusova ingilis dili müəllimlərinin və digər təhsil işçilərinin təkmilləşdirilməsi üzrə təlimlərin hazırlanması və keçirilməsinə öz töhvəsini vermiş və British Council ilə Azərbaycan Respublikasının Təhsil Nazirliyinin müəllim hazırlığı “In-service Teacher Training” müştərək layihəsində müəllim-təlimçi kimi calışmışdır (2003-2007). Dr. Vəfa Yunusova müəyyən fasilələrlə 2008-2017-ci illərdə ABŞ-ın İndiana Universitetində müəllim-tədqiqatçı kimi Azərbaycan dilini “Slavyan və Şərqi Avropa Dilləri” fakültəsinin və eləcə də “Qlobal və Beynəlxalq Tədqiqatlar” Şöbəsinin təşkil etdiyi Dil Yay Məktəblərində tədris etmişdir. Dr. Vəfa Yunusova Böyük Britaniyanin Warwick Universitetinin CELTE mərkəzində “Müəllim və Təlimçilərin Bacarıqlarının İnkişaf etdirilməsi” üzrə intensiv kursu 2004-cü ildə bitirmiş və sonradan Böyük Britaniyanin Essex Universitetinin Beynəlxalq Akademiyasında “Dil Müəllim-təlimçiləri” kursundan 2010-cu ildə məzun olmuşdur. Dr. Vəfa Yunusova Azərbaycanda ingilis dilinin tədrisi ilə bağlı sorğu əsasında aparılmlş “İlkin Tədqiqat”ın həmmüəllifidir, Fəsil 3: Dərsin Təşkili, British Council Azərbaycan, Bakı 2003-2005.